Aranya Kanda, sarga 5

शरभङ्गे दिवं प्राप्ते मुनिसंघाः समागताः
अभ्यगच्छन्त काकुत्स्थं रामं ज्वलिततेजसं

śarabhaṅge divaṃ prāpte munisaṃghāḥ samāgatāḥ
abhyagacchanta kākutsthaṃ rāmaṃ jvalitatejasaṃ

वैखानसा वालखिल्याः संप्रक्षाला मरीचिपाः
अश्मकुट्टाश्च बहवः पत्राहाराश्च तापसाः

vaikhānasā vālakhilyāḥ saṃprakṣālā marīcipāḥ
aśmakuṭṭāś ca bahavaḥ patrāhārāś ca tāpasāḥ

दन्तोलूखलिनश्चैव तथैवोन्मज्जकाः परे
मुनयः सलिलाहारा वायुभक्षास्तथापरे

dantolūkhalinaś caiva tathaivonmajjakāḥ pare
munayaḥ salilāhārā vāyubhakṣās tathāpare

आकाशनिलयाश्चैव तथा स्थण्डिलशायिनः
तथोर्ध्ववासिनो दान्तास्तथार्द्रपटवाससः

ākāśanilayāś caiva tathā sthaṇḍilaśāyinaḥ
tathordhvavāsino dāntās tathārdrapaṭavāsasaḥ

सजपाश्च तपोनित्यास्तथा पञ्चतपोऽन्विताः
सर्वे ब्राह्म्या श्रिया जुष्टा दृढयोगसमाहिताः
शरभङ्गाश्रमे राममभिजग्मुश्च तापसाः

sajapāś ca taponityās tathā pañcatapo'nvitāḥ
sarve brāhmyā śriyā juṣṭā dṛḍhayogasamāhitāḥ
śarabhaṅgāśrame rāmam abhijagmuś ca tāpasāḥ

अभिगम्य च धर्मज्ञा रामं धर्मभृतां वरम्
ऊचुः परमधर्मज्ञमृषिसंघाः समाहिताः

abhigamya ca dharmajñā rāmaṃ dharmabhṛtāṃ varam
ūcuḥ paramadharmajñam ṛṣisaṃghāḥ samāhitāḥ

त्वमिक्ष्वाकुकुलस्यास्य पृथिव्याश्च महारथः
प्रधानश्चासि नाथश्च देवानां मघवानिव

tvam ikṣvākukulasyāsya pṛthivyāś ca mahārathaḥ
pradhānaś cāsi nāthaś ca devānāṃ maghavān iva

विश्रुतस्त्रिषु लोकेषु यशसा विक्रमेण च
पितृव्रतत्वं सत्यं च त्वयि धर्मश्च पुष्कलः

viśrutas triṣu lokeṣu yaśasā vikrameṇa ca
pitṛvratatvaṃ satyaṃ ca tvayi dharmaś ca puṣkalaḥ

त्वामासाद्य महात्मानं धर्मज्ञं धर्मवत्सलम्
अर्थित्वान्नाथ वक्ष्यामस्तच्च नः क्षन्तुमर्हसि

tvām āsādya mahātmānaṃ dharmajñaṃ dharmavatsalam
arthitvān nātha vakṣyāmas tac ca naḥ kṣantum arhasi

अधार्मस्तु महांस्तात भवेत्तस्य महीपतेः
यो हरेद्बलिषड्भागं न च रक्षति पुत्रवत्

adhārmas tu mahāṃs tāta bhavet tasya mahīpateḥ
yo hared baliṣaḍbhāgaṃ na ca rakṣati putravat

युञ्जानः स्वानिव प्राणान्प्राणैरिष्टान्सुतानिव
नित्ययुक्तः सदा रक्षन्सर्वान्विषयवासिनः

yuñjānaḥ svān iva prāṇān prāṇair iṣṭān sutān iva
nityayuktaḥ sadā rakṣan sarvān viṣayavāsinaḥ

प्राप्नोति शाश्वतीं राम कीर्तिं स बहुवार्षिकीम्
ब्रह्मणः स्थानमासाद्य तत्र चापि महीयते

prāpnoti śāśvatīṃ rāma kīrtiṃ sa bahuvārṣikīm
brahmaṇaḥ sthānam āsādya tatra cāpi mahīyate

यत्करोति परं धर्मं मुनिर्मूलफलाशनः
तत्र राज्ञश्चतुर्भागः प्रजा धर्मेण रक्षतः

yat karoti paraṃ dharmaṃ munir mūlaphalāśanaḥ
tatra rājñaś caturbhāgaḥ prajā dharmeṇa rakṣataḥ

सोऽयं ब्राह्मणभूयिष्ठो वानप्रस्थगणो महान्
त्वन्नाथोऽनाथवद्राम राक्षसैर्वध्यते भृशम्

so 'yaṃ brāhmaṇabhūyiṣṭho vānaprasthagaṇo mahān
tvan nātho 'nāthavad rāma rākṣasair vadhyate bhṛśam

एहि पश्य शरीराणि मुनीनां भावितात्मनाम्
हतानां राक्षसैर्घोरैर्बहूनां बहुधा वने

ehi paśya śarīrāṇi munīnāṃ bhāvitātmanām
hatānāṃ rākṣasair ghorair bahūnāṃ bahudhā vane

पम्पानदीनिवासानामनुमन्दाकिनीमपि
चित्रकूटालयानां च क्रियते कदनं महत्

pampānadīnivāsānām anumandākinīm api
citrakūṭālayānāṃ ca kriyate kadanaṃ mahat

एवं वयं न मृष्यामो विप्रकारं तपस्विनम्
क्रियमाणं वने घोरं रक्षोभिर्भीमकर्मभिः

evaṃ vayaṃ na mṛṣyāmo viprakāraṃ tapasvinam
kriyamāṇaṃ vane ghoraṃ rakṣobhir bhīmakarmabhiḥ

ततस्त्वां शरणार्थं च शरण्यं समुपस्थिताः
परिपालय नो राम वध्यमानान्निशाचरैः

tatas tvāṃ śaraṇārthaṃ ca śaraṇyaṃ samupasthitāḥ
paripālaya no rāma vadhyamānān niśācaraiḥ

एतच्छ्रुत्वा तु काकुत्स्थस्तापसानां तपस्विनाम्
इदं प्रोवाच धर्मात्मा सर्वानेव तपस्विनः
नैवमर्हथ मां वक्तुमाज्ञाप्योऽहं तपस्विनम्

etac chrutvā tu kākutsthas tāpasānāṃ tapasvinām
idaṃ provāca dharmātmā sarvān eva tapasvinaḥ
naivam arhatha māṃ vaktum ājñāpyo 'haṃ tapasvinam

भवतामर्थसिद्ध्यर्थमागतोऽहं यदृच्छया
तस्य मेऽयं वने वासो भविष्यति महाफलः
तपस्विनां रणे शत्रून्हन्तुमिच्छामि राक्षसान्

bhavatām arthasiddhyartham āgato 'haṃ yadṛcchayā
tasya me 'yaṃ vane vāso bhaviṣyati mahāphalaḥ
tapasvināṃ raṇe śatrūn hantum icchāmi rākṣasān

दत्त्वा वरं चापि तपोधनानां; धर्मे धृतात्मा सहलक्ष्मणेन
तपोधनैश्चापि सहार्य वृत्तः; सुतीष्क्णमेवाभिजगाम वीरः

dattvā varaṃ cāpi tapodhanānāṃ; dharme dhṛtātmā sahalakṣmaṇena
tapodhanaiś cāpi sahārya vṛttaḥ; sutīṣkṇam evābhijagāma vīraḥ