Uttara Kanda, sarga 62

हते तु लवणे देवाः सेन्द्राः साग्निपुरोगमाः
ऊचुः सुमधुरां वाणीं शत्रुघ्नं शत्रुतापनम्

hate tu lavaṇe devāḥ sendrāḥ sāgnipurogamāḥ
ūcuḥ sumadhurāṃ vāṇīṃ śatrughnaṃ śatrutāpanam

दिष्ट्या ते विजयो वत्स दिष्ट्या लवणराक्षसः
हतः पुरुषशार्दूल वरं वरय राघव

diṣṭyā te vijayo vatsa diṣṭyā lavaṇarākṣasaḥ
hataḥ puruṣaśārdūla varaṃ varaya rāghava

वरदाः स्म महाबाहो सर्व एव समागताः
विजयाकाङ्क्षिणस्तुभ्यममोघं दर्शनं हि नः

varadāḥ sma mahābāho sarva eva samāgatāḥ
vijayākāṅkṣiṇas tubhyam amoghaṃ darśanaṃ hi naḥ

देवानां भाषितं श्रुत्वा शूरो मूर्ध्नि कृताञ्जलिः
प्रत्युवाच महाबाहुः शत्रुघ्नः प्रयतात्मवान्

devānāṃ bhāṣitaṃ śrutvā śūro mūrdhni kṛtāñjaliḥ
pratyuvāca mahābāhuḥ śatrughnaḥ prayatātmavān

इमां मधुपुरीं रम्यां मधुरां देव निर्मिताम्
निवेशं प्राप्नुयां शीघ्रमेष मेऽस्तु वरो मतः

imāṃ madhupurīṃ ramyāṃ madhurāṃ deva nirmitām
niveśaṃ prāpnuyāṃ śīghram eṣa me 'stu varo mataḥ

तं देवाः प्रीतमनसो बाढमित्येव राघवम्
भविष्यति पुरी रम्या शूरसेना न संशयः

taṃ devāḥ prītamanaso bāḍham ity eva rāghavam
bhaviṣyati purī ramyā śūrasenā na saṃśayaḥ

ते तथोक्त्वा महात्मानो दिवमारुरुहुस्तदा
शत्रुघ्नोऽपि महातेजास्तां सेनां समुपानयत्

te tathoktvā mahātmāno divam āruruhus tadā
śatrughno 'pi mahātejās tāṃ senāṃ samupānayat

सा सेना शीघ्रमागच्छच्छ्रुत्वा शत्रुघ्नशासनम्
निवेशनं च शत्रुघ्नः शासनेन समारभत्

sā senā śīghram āgacchac chrutvā śatrughnaśāsanam
niveśanaṃ ca śatrughnaḥ śāsanena samārabhat

सा पुरी दिव्यसंकाशा वर्षे द्वादशमे शुभा
निविष्टा शूरसेनानां विषयश्चाकुतोभयः

sā purī divyasaṃkāśā varṣe dvādaśame śubhā
niviṣṭā śūrasenānāṃ viṣayaś cākutobhayaḥ

क्षेत्राणि सस्ययुक्तानि काले वर्षति वासवः
अरोगा वीरपुरुषा शत्रुघ्नभुजपालिता

kṣetrāṇi sasyayuktāni kāle varṣati vāsavaḥ
arogā vīrapuruṣā śatrughnabhujapālitā

अर्धचन्द्रप्रतीकाशा यमुनातीरशोभिता
शोभिता गृहमुख्यैश्च शोभिता चत्वरापणैः

ardhacandrapratīkāśā yamunātīraśobhitā
śobhitā gṛhamukhyaiś ca śobhitā catvarāpaṇaiḥ

यच्च तेन महच्छून्यं लवणेन कृतं पुरा
शोभयामास तद्वीरो नानापण्यसमृद्धिभिः

yac ca tena mahac chūnyaṃ lavaṇena kṛtaṃ purā
śobhayām āsa tad vīro nānāpaṇyasamṛddhibhiḥ

तां समृद्धां समृद्धार्थः शत्रुघ्नो भरतानुजः
निरीक्ष्य परमप्रीतः परं हर्षमुपागमत्

tāṃ samṛddhāṃ samṛddhārthaḥ śatrughno bharatānujaḥ
nirīkṣya paramaprītaḥ paraṃ harṣam upāgamat

तस्य बुद्धिः समुत्पन्ना निवेश्य मधुरां पुरीम्
रामपादौ निरीक्षेयं वर्षे द्वादशमे शुभे

tasya buddhiḥ samutpannā niveśya madhurāṃ purīm
rāmapādau nirīkṣeyaṃ varṣe dvādaśame śubhe